المسحراتي3| أشعار فؤاد حداد.. تعرفني من صوتي

كتب – فؤاد حداد
تصوير – سمر شومان
3- تعرفنى من صوتى
اصحى يا نايم
وحّد الدايم
وقول نويت
بكره ان حييت
الشهر صايم
والفجر قايم
اصحى يا نايم
وحّد الرزاق
رمضان كريم
مســحـراتى مُدن وريف
مـنـقـراتى خفيف خفيف
أدور شويه هنا وهنا
أصحّى مؤمن ومؤمنه
فى حى غيرنا وحينا
وارجع يا عينى على الضنى
وادق بابك
ولما تسأل اقول أنا
تعرفنى من صوتى يا وليف
مسـحراتى عدو الخريف
مـنـقـراتى بنغم ظريف
وان كنت شايل خمسين سنه
لا ظهرى مايل ولا انحنى
شفت الهوايل شفت الهنا
شفت ابتسامتك متلحنه
أرجع يا روحى على الغنا
وادق بابك
ولما تسأل أقول أنا
تعرفنى من صوتى يا وليف
والمشى طاب لى
والدق على طبلى
ناس كانوا قبلى
قالوا فى الأمثال:
“الرجل تدب مطرح ماتحب”
* * *
وانا صنعتى مســحـراتى فى البلد جوال
حبيت ودبيت كما العاشق ليالى طوال
وكل شبر وحته من بلدى
حته من كبدى
حته من موال:
يا طالب الاجر قبل الفجر سامعنا
فى الدعوه للخير سبقنا الطير وسارعنا
نتمنى كل البلد عيله وصباحها ندى
رمضان بساط أحمدى الكل سايعنا
اصـحى يانايم
وحّد الدايم
السعىُ للصوم
خيرٌ من النوم
دى ليالى سمحه
نجومها سبحه
اصـحى يانايم
يانايم اصحى
وحّد الرزاق

فؤاد حداد