المسحراتي – فؤاد حداد (10)

كتبت القصائد من صاحب ندا إلى مع السلامة في رمضان 1388
نوفمبر 1968
القمر
ِ
اصحى يا نايم
وحّد الدايم
وقول نويت
بكره ان حييت
الشهر صايم
والفجر قايم
اصحى يا نايم
وحّد الرزاق
رمضان كريم
مســحـراتى فى شهر الصيام
مـنـقـراتى على الدوام
شوف القمر اكتمل تمام
من ألف ليله وألف عام
قمر يراكم مغرب وشام
قمر تراحم قمر وئام
يا من تواصوا ألفين سلام
قمر محجّب بالابتسام
بشفه يحبى فيها الكلام
لاغى الحمام اللى فى الإمام
فى السيده حنّ للمقام
ذكر معانا وقال ما بانام
ذكرت يا سعد يا كرام
والليل قطيفه ولا ملام
تحت القمر قلبى فى هيام
من ليلة النصف للختام
فى ليلة القدر له مرام
المشى طاب لى
والدق على طبلى
ناس كانوا قبلى
قالوا فى الأمثال:
“الرجل تدب مطرح ماتحب”
* * *
وانا صنعتى مســحـراتى فى البلد جوال
حبيت ودبيت كما العاشق ليالى طوال
وكل شبر وحته من بلدى
حته من كبدى
حته من موال:
بعد الشهاده وبعد السجده للرحمن
حينكتب لى قيام الليل وصوم رمضان
وما دمت عارف طريقى وصالح النيه
وكل خطوه تزيد أوصالى حنيه
فى ساعة الفجر يفتح لى الأمل رضوان
اصـحى يانايم
وحّد الدايم
السعىُ للصوم
خيرٌ من النوم
دى ليالى سمحه
نجومها سبحه
اصـحى يانايم
يانايم اصحى
وحّد الرزاق
المسحراتي – فؤاد حداد (9)