المسحراتي- فؤاد حداد (24)

اكتبت لقصائد من صاحب ندا إلى مع السلامه فى رمضان 1388
نوفمبر 1968
اتشجعوا
ِ
اصحى يا نايم
وحّد الدايم
وقول نويت
بكره ان حييت
الشهر صايم
والفجر قايم
اصحى يا نايم
وحّد الرزاق
رمضان كريم
مســحـراتى
مـنـقـراتى
رمضان يا ولدى باودعه
ليلى وعينى الاتنين سعوا
بلال وبلبل اتجمعوا
علشان ينوحوا ويدمعوا
سمعنا هاتف اتشجعوا
الهى قادر يرجعه
قوم انت اسقى اللى يزرعوا
انشد مديح الى يصنعوا
غنى الحديد واللى طوعه
والأمهات لما يرفعوا
ايدين بتشقي، إذا دعوا
حطوا الجبل للى يطلعه
وفى طاقة القدر وسّعوا
قوم انت نقّر
الليل ينوّر
قلبك دا ملك اللى يسمعه
المشى طاب لى
والدق على طبلى
ناس كانوا قبلى
قالوا فى الأمثال:
“الرجل تدب مطرح ماتحب”
* * *
وانا صنعتى مســحـراتى فى البلد جوال
حبيت ودبيت كما العاشق ليالى طوال
وكل شبر وحته من بلدى
حته من كبدى
حته من موال:
كنا تلاته أربعه والا أربعه خمسه
فى حى الازهر بنسهر من قديم الدهر
نقول فى كان ياما كان وفى أصبح وأمسى
ويدور علينا نبات الشاى بلون الزهر
فكرك يا شهر الزمان يحفظ لنا همسه
يا شهر والا جميع كل الزمان ينسى
لا أوحش الله منك المسلمين يا شهر
اصـحى يانايم
وحّد الدايم
السعىُ للصوم
خيرٌ من النوم
دى ليالى سمحه
نجومها سبحه
اصـحى يانايم
يانايم اصحى
وحّد الرزاق