لماذا "شم النسيم" يليق بالفيوم؟

لو حابب تقضى شم النسيم خارج القاهرة بنرشحلك الفيوم هناك هتلاقي مكس ما بين الحياة البسيطة جدًا، مع وجود مساحات كبيرة من المياه والخضرة، زي بحر يوسف وبحيرة قارون، وكمان هتلاقي البدو والصيادين، وهتفصل من خنقة القاهرة وزحمتها.
هتروح ازاي؟
شوف يا سيدي لو أنت من القاهرة أو الجيزة، ومعاك عربيتك تقدر توصل الفيوم في أقل من ساعتين، من ميدان الرماية وتاخد طريق الفيوم، أو من أكتوبر وتاخد طريق الواحات اللي هيوصلك للفيوم.
ولو حابب تركب ميكروباص يبقى عندك 4 نقاط للتحرك، الأولى من المنيب والأجرة 13 جنيه بس، والتانية من رمسيس جنب موقف أحمد حلمي، والأجرة 15 جنيه، والتالتة من المرج، والأجرة 15 جنيه، وكمان تقدر تركب من ميدان الجيزة، أو تركب من أكتوبر من ميدان الحصري أو من الموقف بتاع الحي السادس، وأقرب وأسرع نقطة انطلاق هي ميدان الرماية، الرحلة من هناك مش هتكمل ساعة.
لو حابب تركب سوبر جيت يبقى هتروح المنيب أو رمسيس.
أما لو جاى من إسكندرية، فعندك رحلتين سوبر جيت بيتحركوا يوميًا للفيوم، وأول رحلة عودة بتكون الساعة 8 صباحًا، والتانية الساعة 2 الضهر.
لو حابب تركب قطر فالرحلة هتطول شوية على حسب هتركب من فين، المهم إنك هتنزل مركز الواسطى في بني سويف، ومن هناك تركب للفيوم.
مدينة الفيوم
المدينة هادية مش هتلاقى فيها زحمة والمواصلات رايقة، وتعريفة التاكسى فى المدينة موحدة لأي مكان داخلها، متدفعش أكتر من 5 جنيه، أما لو هتاخد التاكسى برا المدينة وتروح بحيرة قارون أو “البِركة” زي ما أهل الفيوم بيسموها، بيكون باتفاق مع السواق وبتبقى الأجرة 50 جنيه أو أكتر شوية حسب شطارتك في التفاوض، وفيه كمان عربيات أجرة بتروح البحيرة هتلاقيها موجودة في موقف سنهور، وبتكون الأجرة 4 جنيه بس، بس دى عربيات نقل ومتقفلة بصندوق، عامة لو حابب تجرب حاجة جديدة يبقى دوس ومتخافش.
المسلة والسواقى
أول حاجة هتشوفها فى المدينة هى المسلة الفرعونية، هتقابلك في مدخل الفيوم بناها الملك سنوسرت الأول، من الجرانيت الوردي، ارتفاعها 13 متر.

بعدها بمسافة بسيطة هتلاقى سواقي الفيوم المشهورة، طبعا دى مش كل السواقي، دول 4 بس في الميدان، واسمها سواقي الهدير، والفيوم مشهورة بالسواقي ولسه بتستخدمها في الزراعة لدلوقتي، وفيها أكتر من 200 ساقية.
شوف الموضوع ده لو حابب تعرف أكتر عن سواقي الفيوم
 http://bit.ly/2nbB4dn
 اوعى يفوتك
حاجات كتير لما تروح الفيوم أوعى يفوتك إنك تجربها، اركب حنطور زي زمان واتفسح ولف الفيوم، هتلاقيه موجود عند السواقي، تجربة حلوة مع صحابك، ومتنساش تتصور سيلفي الحنطور، ومش هتدفع كتير، 50 جنيه فى الساعة.
روح كافيهات وقهاوي وسط البلد، زي كافيه هارون في منطقة باغوص، هو عبارة عن دورين ويطل على بحر يوسف، وفيه مشروبات مميزة جدًا زي مشروب “فور سيزون” و”هوت سيدر”.
هتلاقي كمان في منطقة المسلة ودلة، كافيهات مصر القديمة، و برولا، وبيت العيلة، وفي منطقة لطف الله، وشارع النادي ننصحك بكافيه تايم أوت.
ولو عاوز تجرب قهاوي زمان، فننصحك بقهوة القللي في شارع الورشة، قريبة من منطقة السواقي، هتعيش فيها مع الناس بتوع زمان لأن القهوة في منطقة أغلبها منازل قديمة بمشربياتها الأرابيسك الجميلة، كمان هتلاقي قهوة الشيشاني على بحر يوسف.
متنساش هدية حبايبك
الفيوم فيها أجمد شغل فخار ممكن تشوفه في مصر، هتلاقيه في وسط البلد، عند ميدان السواقي وبطول بحر يوسف هتلاقي منتجات مصنوعة من الفخار، وكمان السلال والشنط المصنوعة من الخوص، ودي سعرها من 10 إلى 15 جنيه علي حسب حجمها، كمان لو عايز تجيب لحبيبتك هدية عليها أول حرف من اسمك هتلاقي “ماجات” مصنوعة من الفخار ومكتوب عليها الحروف كلها سواء بالعربي أو بالإنجليزي، الواحد بـ 25 جنيه بس.

بتحب القزقزة؟
وانت فى منطقة السواقي متنساش تجرب اللب والفول من أشهر وأقدم مقلة فى الفيوم (مقلة السواقي)، وهناك هتبقى قدام قصر ثقافة الفيوم بشكله وطرازه المعماري الفريد، اللى على شكل هرم مقلوب، وممكن بقى تدخل تتابع حفلات وشعر وموسيقى ، وفيه حفلات ومسرحيات وفرق إنشاد ديني وحفلات لفرقة الموسيقى العربية، هتستمتع قوي وانت بتسمع أغانيها اللي هترجعك لزمن الفن الجميل، وكل ده مجانا.
جوعت؟
الأكل فى الفيوم هيعجبك، والمطاعم كتير وفيه مطاعم مشهورة زي كنتاكي وكوك دور، أما أشهر محلات ومطاعم الأكل هتلاقي مطعم بهية ومطعم أوزي، وبريمو، أما الأسماك أشهر محلات السمك فى الفيوم، ابن حميدو، على كوبري الشيخ سالم، وأفندينا، وده له أكثر من فرع، وكمان ريزو ودا في منطقة المسلة.
عجبتك الفيوم ويوم واحد مش كفاية؟
دي بقى أشهر فنادق الفيوم والقرى السياحية لو ناوي تبات ليلة او تقضي أكتر من يوم.
فندق و قرية ارابيان نايتس الفيوم
Arabian Nights Country Club & Resort
وده أول حاجة هاتقابلك عند الكيلو 48 طريق القاهرة الفيوم الصحراوي، على بعد 30 دقيقة بس من ميدان الرماية، وهو منتجع سياحي فيه ملاعب كرة قدم، وطايرة، وحمام سباحة، وقعدات عربي، وسويتات، وغرف فندقية لقضاء اليوم الواحد أو المبيت لأكثر من ليلة، وفيه كمان مطاعم أسماك ومشويات وكل أنواع الفطاير، وفيه كمان سنتر للسفاري بالبيتش باجي، والخيول والجمال، ومدرسة للفروسية، وصالة ألعاب “بلياردو، بينج بونج، بلاي ستيشن، بيبي فوت، اير هوكي، وأماكن مخصصة لألعاب الأطفال.
وكمان فيه حمام سباحة خاص وسويتات vip، ومسرح لإقامة الحفلات، وتقام فيه الحفلات البدوية مع العشاء Open Buffet، والشو النوبي، والرقص الشرقي، وفرقة الفنون الاستعراضية.
أما في مدينة الفيوم، فهتلاقي فندق الـ”هني دي”، من أفضل الأماكن اللي ممكن تنزل فيها وأسعاره كمان مناسبة جدًا 250 جنيه فى الليلة بالفطار للفرد الواحد.
ولو انتوا جروب كبير، يبقى فندق كلية السياحة بجامعة الفيوم، اختيار مناسب، وأسعاره حلوة ويمتاز بغرفه الواسعة، اللى فيها مكان لثلاثة أفراد فى الغرفة، وعلى فكرة هو حاصل على شهادة الأيزو وممكن كمان تستمتع بالتمشية فى حديقة الجامعة الرائعة.
بحيرة قارون

متنساش زيارة بحيرة قارون الجزء المتبقي من بحيرة موريس القديمة، وأكبر بحيرة مالحة في مصر، وأقدم بحيرات العالم، وبتتوافد عليها مئات الأنواع من الطيور المهاجرة والمقيمة.
أشهر الفنادق على بحيرة قارون فندق هلنان “أوبرج الفيوم”،  ودا فندق 5 نجوم.
وأوبرج الفيوم، أسطورة ملكية في صورة فندق كان في عام 1937 استراحة شتوية للملك فاروق للاستجمام وممارسة هواية الصيد، وعلى فكرة لسه الجناح الملكى بتاع المللك زي ما هو وممكن تقيم فيه.
الحجز في الأوبرج لازم يكون قبلها بفترة، وميعاد الحجز من الساعة 9 صباحا لـ4 مساءً، ودي أرقام الحجز: 01285106010 ــ 0846981200 auberge.fayoum@helnan.com
أسعار حجز الغرفة المزدوجة بالفطار والعشا 1000 جنيه في الليلة الواحدة للمصريين لشخصين، وأقصى عدد ممكن يستخدم الغرفة هو ثلاثة أفراد فقط، الفرد في الغرفة المزدوجة 500 جنيه شاملة الفطار.
ا‏لقرية الريفية
أسعار حنينة وخدمة معقولة، فيها مطاعم رائعة بتقدم كل أنواع الأسماك والطيور والمشويات، وفيها كمان ملاهي للأطفال، وشاليهات مكيفة بـ 300 جنيه لليلة شاملة الفطار اللي بيكون عسل وفطير، وأماكن لركوب الخيل والجمال.
وفي نقطة إسعاف تبعد عن القرية بـ 500 متر بس.
ا‏لقرية الريفية أول مكان على بحيرة قارون مخصص للعائلات، ولا يسمح بدخول الشباب سوى الثنائيات فقط لمنع حدوث المعاكسات.
تتراوح قيمة الوجبة في القرية الريفية من 55 إلى 75 جنيه، ولو عاوز تركب خيل فهتدفع 50 جنيه في النص ساعة.
مكان القرية بعد فندق القوات المسلحة بكيلو على بحيرة قارون، قرية أبو نعمة ــ المدخل الترابي ــ الموازي لإسعاف الشاطئ على بعد 500 متر، وهو بعد فندق الأوبرج والجوهرة ومدخله على اليمين.
أرقام القرية: 01114430339 ــ 01110900889 ــ 01002583655
فندق بانوراما
فندق متوسط في نفس المستوى بتاع القرية الريفية، سعر الغرفة للفرد الواحد 300 جنيه بالفطار، ودبل بـ 400 جنيه، ولو 3 أفراد 460 جنيه، والجناح لمدة يوم يتسع لأربع أفراد بغرفتين وحمام، وشامل الفطار، بـ 550 جنيه، ولو 6 أفراد 680 جنيه.
رقم الفندق: 0846831114
سمك البحيرة
نفسك هفتك على أكلة سمك وانت على البحيرة، يبقى ما فيش غير مفرح بتاع السمك ودا من أشهر مطاعم الأسماك اللى على البحيرة، وبيقدم أحلى وأرخص أنواع الأسماك بمنطقة شكشوك، وأسعار الوجبات بتبدأ من 65 جنيه للوجبة الكاملة.
رقم المطعم: 01062818998
قرية تونس
مش محتاج تسافر لتونس علشان تستمتع بالطبيعة الخلابة، عندك في الفيوم قرية اسمها تونس وهي قطعة فعلا من تونس الخضرا، هتلاقيها على ضفاف بحيرة قارون، تقدر لو أنت فى المدينة تركب تاكسى بـ 50 جنيه، أو عربيات أجرة من موقف سنهور رايحة البحيرة ودى أجرتها 4 جنيه، توصلك لقرية تونس، المشهورة بورش صناعة الفخار والخزف، وركوب الخيل، والمراكب، ورحلات السفاري، والفنادق اللي هتعيشك أجواء الريف العربي، وكمان الفاخرة على الطراز الملكي زي:
منتجع وسبا نزل لازيب
ودا من أغلى الأماكن اللي ممكن تشوفها في الفيوم، بيضم 8 أجنحة فاخرة جدًا، مساحة الجناح 80 متر، حجز الليلة بـ4500 جنيه للفرد بدون فطار.
عاوز حاجة على قد الإيد
هتلاقى فى تونس كمان فنادق متوسطة وكمان فيه الاقتصادى اللي في متناول الشخص العادي زي:
فندق سوبك: 01068885423 – 01006787478
فندق ظلال النخيل: 01097771143
فندق بيوم: 01100044464
فندق كوم الدكة: 01274200209
وطبعًا فندق زاد المسافر واللي من أجمل وأرخص الأماكن في تونس وممكن تلاقى هناك غرفة اقتصادية صغيرة بـ 60 جنيه فى الليلة.
ولو بتحب السفاري والجو العربي في الصحراء ممكن من هناك تطلع رحلة سفاري لصحراء وادي الريان، ومتقلقش لو مش معاك عربية دفع رباعي هتلاقي هناك اللي ممكن يجيبلك العربية ويكون دليلك، العربية تسع 6 أفراد للرحلة و إيجارها 850 جنيه.
الرحلة بتكون زيارة لوادي الريان ــ وادي الحيتان- والبحيرة السحرية ــ التزحلق ع الرمال ـ المنطاد، الشلالات، والفطار هناك الوجبه بـ25 جنيه، والغذاء يتراوح ما بين 60 جنيه لـ75 جنيه.
متحف الكاريكاتير ومدرسة افلين
وأنت في قرية تونس متفوتش زيارة متحف الكاريكاتير للفنان محمد عبلة، ورسم دخول المتحف 5 جنيه، ومدرسة الخزف اللي بتديرها الفنانة السويسرية إيفلين، وتتفرج كمان على طريقة صناعة الخزف.
لو عاوز تعرف أكتر عن قرية تونس اقرا المواضيع دي:
الفنان التشكيلي محمد عبلة
http://bit.ly/2nLgWuN
عاشقة الخزف
http://bit.ly/2obatfT
إيفيلين السويسرية
http://bit.ly/2o4oeMQ
وادي الحيتان
نيجي بقى لمكان ملوش مثيل في مصر كلها، موجود جوه محمية وادي الريان، هتلاقي هياكل عظمية لحيتان موجودة في قلب الصحراء، أه والله زي ما بقولك كده، دي من آثار بحر قديم جدًا اسمه تيثس كان موجود في المنطقة من ملايين السنين، مئات من هياكل الحيتان وبقايا حفرية لأسماك القرش‏ وأصداف وحيوانات بحرية، وأعشاب وأشجار المنجروف المتحجرة، اللي بتخلي المنطقة وكأنها متحف مفتوح، واختارتها اليونسكو، في عام 2005، أول “منطقة تراث طبيعي” في العالم، بعد العثور على هياكل لحيتان متحجرة من فصيلة “الباسيلوسورس”، بيرجع عمرها إلى 40 مليون سنة.

بس دى عشان تروحها لازم عربية دفع رباعي هتأجرها من قرية تونس، بـ 800 جنيه في اليوم.
اقرا الموضوع ده علشان تعرف أكتر عن وادي الحيتان
http://bit.ly/2da6dWD
منطقة وادى الريان وجبل المدورة
وادى الريان محمية طبيعية على بعد 77 كم من مدينة الفيوم، تكلفة التاكسى من مدينة الفيوم للريان حوالى 250 جنيه، أشهر مكان فى الوادى منطقة الشلالات ومناطق مراقبة الطيور ومساحته 35 ألف فدان.
جبل النهدين من أجمل صور إبداع الطبيعة موجود على ساحل البحيرة السفلي لوادي الريان بعد منطقة الشلالات، المنطقة تصلح لممارسة الرياضات البحرية، ورحلات السفاري، وركوب الخيل والجمال ومراقبة الطيور.
بتحب الآثار الفرعونية؟
تحب تزور الأهرامات، أه بجد، الفيوم فيها أهرامات
هرم هوارة
بناه فرعون مصر امنمحات الثالث من ملوك الأسرة الـ 12، بقرية هوارة على بعد 9 كم جنوب شرق مدينة الفيوم، ودا قريب من مدينة الفيوم والتاكسى بياخد 70 جنيه، ارتفاعه الأصلي 58 متر، مفيش منه غير 20 متر حاليًا، وهو مكون دهاليز وحجرات كتير، تنتهي بحجرة الدفن، واللي فيها تابوت حجري ضخم من قطعة واحدة من حجر الكوارتزيت يصل وزنها إلى 110 طن.
هرم اللاهون

بناه الملك سنوسرت الثاني من الطوب اللبن فوق ربوة عالية ارتفاعها 12 متر، على مشارف مدينة اللاهون، على بعد 22 كيلومتر عن مدينة الفيوم. ارتفاع الهرم 48 متر، وعكس كل أهرامات مصر مدخله من الجانب الجنوبي.
قصر الصاغة
ويقع على بعد 8 كم شمال بحيرة قارون، هو معبد صغير من عصر الدولة الوسطى يقع في الجزء الشمالي من بحيرة قارون بني من الحجر الجيري.
مدينة ماضي الأثرية
وتقع مدينة ماضي علي بعد 35 كم من مدينة الفيوم، وممكن تاخد تاكسى من المدينة بحوالى 150 جنيه، لزيارة المدينة، بناها الملك امنمحات الثالث وجه من بعده ابنه امنمحات الرابع وكمل بنا المدينة، ومبانيها من الحجر الجيري، وفيها طريق للكباش زى طريق الكباش اللى فى الأقصر.

ده كمان فيه آثار يونانية ورومانية
مدينة كرانيس 
أول حاجة ممكن تزورها فى طريقك وانت جاى الفيوم أو تنهى بيها زيارتك للفيوم لانها تقع بمنطقة كوم أوشيم علي طريق الفيوم القاهره الصحراوي علي بعد 35 كم من مدينة الفيوم بها معبدان لعبادة الإله سوبك ومعاصر النبيذ في الطريق إلى المعبد الشمالي.
متحف كوم أوشيم للآثار
المتحف مفتوح طوال أيام الأسبوع، من الساعة 9 صباحا إلى الساعة 4 مساء، ثمن التذكرة 3جنيه للطلبة المصريين و10 جنيه للطلبة الأجانب، و5 جنيه للمصريين و20 جنيه للأجانب.
مدينة أم الأتل
ودي عبارة عن أطلال مدينة باكخياس اليونانية على بعد 8 كم شرق مدينة كرانيس وبها معبد الإله سوبك وأطلال منازل من الطوب اللبن وكانت مركز للوحي عند اليونان.

معبد قصر قارون
معبد قصر قارون علي بعد 44 كم من مدينة الفيوم، شمال غرب مدينة الفيوم، ودا ممكن توصله عن طريق التاكسى من مدينة الفيوم وتكلفته 200 جنيه، يرجع إلى العصر البطلمي شيده بطليموس يضم 365 حجرة، وقدس الأقداس لعباده التمساح معبود الفيوم و الإله ديونيسوس إله الخمر عند الخمر عند اليونان وبيكون فيه مهرجان تعامد الشمس كل عام على قدس الأقداس.
أطلال مدينة ديمية السباع
ديمية السباع تقع على بعد 3 كم شمال بحيرة قارون وهي أطلال مدينة اسكبونايوس المدينة البطلمية القديمه مبنية من الطوب اللبن، وكانت نقطة سير القوافل المتجهة للصحراء الغربية.
عاوز جو روحانيات؟
بتحب تزور الأماكن الدينية العريقة سواء قبطية أو إسلامية؟
المساجد الأثرية
الفيوم فيها 3 مساجد أثرية كبرى موجودين كلهم في مدينة الفيوم، تقدر توصلهم بتاكسي مش هيكلفك أكتر من 5 جنيه فقط.
مسجد قايتباي
و شيدته السيدة خوندا أصلباى زوجة السلطان قايتباي و يعتبر فريدا من نوعه حيث ان منبره مطعم بسن الفيل المستورد من الصومال و مركب من جزيئات صغيرة يمكن فكها وتركيبها.

المسجد المعلق
يقع فى مدينة الفيوم، يرجع تاريخه للعصر العثماني – شيده الأمير سليمان علي طراز المساجد المملوكية وسمي بالمسجد المعلق حيث تم بناؤه على مكان مرتفع.
مسجد  ومقام  الشيخ على الروبي
يقع فى مدينة الفيوم  فى حى الحواتم أمام المطافى، شيده السلطان برقوق من الطوب اللبن و مئذنته تشبه مئذنة الجامع الأزهر الشريف واللي في الطرف الغربى من مدينة الفيوم، وبيقام سنويًا بمحيط المسجد والمقام، مولد الشيخ علي الروبي في ليلة النص من شهر شعبان، واللي بيجيه شيوخ الطرق الصوفية والمنشدين من كل مصر.
الآثار القبطية 
دير الملاك
غبريال بجبل النقلون بمركز إطسا واللي بيبعد 13 كم جنوبي الفيوم و بيرجع للقرن الخامس الميلادي وهو من أقدم الأديرة بالفيوم وفيه كنيسة الملاك غبريال الآثرية ويصعب دخوله فى فترات الصلوات لأنه بيكون مغلق.

دير العزب
وده موجود بقرية العزب على بعد 5 كم جنوب الفيوم، وممكن تركب من موقف بنى سويف اللي في الحواتم بـ 2 جنيه، وفيه كنيسة أثرية للسيدة العذراء ومزار للأنبا إبرام، ومتحف المخطوطات، وكنيسة أبي السيفين، وبعض الكنائس الحديثة.